ກອງປະຊຸມຝຶກອົບຮົມ ກ່ຽວກັບ ວຽກງານການຢັ້ງຢືນແຫຼ່ງກໍາເນີດສິນຄ້າ ໃຫ້ຄະນະຄຸ້ມຄອງເຂດເສດຖະກິດພິເສດ ແຂວງຫຼວງນໍ້າທາ, ຜູ້ພັດທະນາ ແລະ ບັນດາວິສາຫະກິດພາຍໃນເຂດ ບໍ່ເຕ່ນແດນງາມ ໃນລະຫວ່າງວັນທີ 19 - 25 ພຶດສະພາ 2024 ທີ່ ຫ້ອງການປະຕູດຽວ ຂສພ ບໍ່ເຕ່ນແດນງາມ
ໃນລະຫວ່າງວັນທີ 20 ຫາ 24 ພຶດສະພາ 2024 ທີ່ຫ້ອງປະຊຸມຂອງ ຄະນະຄຸ້ມຄອງເຂດເສດຖະກິດພິເສດແຂວງຫຼວງນໍ້າທາ ກົມການຄ້າຕ່າງປະເທດ, ກະຊວງອຸດສາຫະກຳ ແລະ ການຄ້າ ໄດ້ມີການຈັດຝຶກອົບຮົມ ກ່ຽວກັບລະບຽບແຫຼ່ງກໍາເນີດສິນຄ້າ ໃຫ້ພະນັກງານປະຈໍາຫ້ອງການຄະນະຄຸ້ມຄອງເຂດເສດຖະກິດພິເສດແຂວງຫຼວງນໍ້າທາ, ຜູ້ພັດທະນາ ແລະ ຜູ້ປະກອບການຈຳນວນໜຶ່ງພາຍໃນເຂດເສດຖະກິດພິເສດ ຕາມການສະເໜີຂອງພາກສ່ວນດັ່ງກ່າວ. ຊຸດຝຶກອົບຮົມຄັ້ງນີ້ ໄດ້ດຳເນີນພາຍໃຕ້ການເປັນປະທານຮ່ວມຂອງ ທ່ານ ພຸດສະຫວັນ ຂຸນຈັນທະ ຮອງຫົວໜ້າກົມ ການຄ້າຕ່າງປະເທດ, ທ່ານ ນາງ ລັດຕະນາ ອິນທະພົນ, ຮອງຫົວໜ້າຫ້ອງການສົ່ງເສີມ ແລະ ຄຸ້ມຄອງເຂດເສດຖະກິດພິເສດ, ກະຊວງແຜນການ ແລະ ການລົງທຶນ ແລະ ທ່ານ ສີພອນ ດວງຈຳປາ ຫົວໜ້າຄະນະຄຸ້ມຄອງເຂດເສດຖະກິດພິເສດແຂວງຫຼວງນໍ້າທາ ໂດຍມີຜູ້ເຂົ້າຮ່ວມທັງໝົດ ຈຳນວນ 27 ທ່ານ.
ຈຸດປະສົງຂອງການຝຶກອົບຮົມໃນຄັ້ງນີ້ ແມ່ນເພື່ອເປັນການກະກຽມຄວາມພ້ອມໃຫ້ແກ່ການມອບສິດໃຫ້ຫ້ອງການຄະນະຄຸ້ມຄອງເຂດເສດຖະກິດພິເສດແຂວງຫຼວງນໍ້າທາ ເປັນຫ້ອງການເຈົ້າໜ້າທີ່ອອກໃບຢັ້ງຢືນແຫຼ່ງກຳເນີດສິນຄ້າທີ່ໄດ້ຮັບສິດທິພິເສດ ໂດຍໄດ້ແນະນຳໃຫ້ມີຄວາມຮັບຮູ້ ແລະ ເຂົ້າໃຈ ກ່ຽວກັບ ລະບຽບແຫຼ່ງກຳເນີດສິນຄ້າພາຍໃຕ້ລະບົບສິດທິພິເສດທາງດ້ານການຄ້າແບບທົ່ວໄປ (GSP) ແລະ ພາຍໃຕ້ຂອບສັນຍາການຄ້າເສລີຕ່າງໆ (FTAs) ລວມເຖິງຂັ້ນຕອນການອອກ ແລະ ຄຸ້ມຄອງໃບຢັ້ງຢືນແຫຼ່ງກຳເນີດສິນຄ້າ ເພື່ອຮັບປະກັນໃຫ້ວຽກງານດັ່ງກ່າວໄດ້ຮັບການຈັດປະຕິບັດໃຫ້ສອດຄ່ອງກັບລະບຽບການພາຍໃນຂອງ ສປປ ລາວ ແລະ ຂອງຕ່າງປະເທດທີ່ກ່ຽວຂ້ອງ.
ການກະກຽມມອບສິດດັ່ງກ່າວ ແມ່ນເປັນການປະຕິບັດຕາມນະໂຍບາຍທີ່ກ່ຽວຂ້ອງຂອງລັດຖະບານ ໂດຍສະເພາະແມ່ນນະໂຍບາຍການອຳນວຍຄວາມສະດວກທາງດ້ານການຄ້າ ຊຶ່ງມາຮອດປະຈຸບັນ ທາງກະຊວງອຸດສາຫະກຳ ແລະ ການຄ້າ ໄດ້ມີການມອບສິດໃຫ້ພາກສ່ວນຕ່າງໆຂອງຂັ້ນທ້ອງຖິ່ນ ເປັນຜູ້ອອກໃບຢັ້ງຢືນແຫຼ່ງກຳເນີດສິນຄ້າແລ້ວຈຳນວນ 40 ຫ້ອງການ ໃນຂອບເຂດທົ່ວປະເທດ ໂດຍປະກອບມີ: ພາກສ່ວນພະແນກອຸດສາຫະກຳ ແລະ ການຄ້າແຂວງ (18 ຫ້ອງການ), ພາກສ່ວນສະພາການຄ້າ ແລະ ອຸດສາຫະກຳແຫ່ງຊາດ-ແຂວງ (18 ຫ້ອງການ) ແລະ ພາກສ່ວນເຂດເສດຖະກິດພິເສດ (4 ຫ້ອງການ), ຊຶ່ງຫ້ອງການຄະນະຄຸ້ມຄອງເຂດເສດຖະກິດພິເສດແຂວງຫຼວງນໍ້າທາ ຈະເປັນຫ້ອງການທີ 41 ທີ່ໄດ້ຮັບການມອບສິດດັ່ງກ່າວ.
ໃບຢັ້ງຢືນແຫຼ່ງກຳເນີດສິນຄ້າ ແມ່ນເປັນເອກະສານທີ່ນຳໃຊ້ເພື່ອຂໍຍົກເວັ້ນ ຫຼື ຫຼຸດຜ່ອນອັດຕາພາສີນໍາເຂົ້າຈາກບັນດາປະເທດທີ່ໄດ້ໃຫ້ສິດທິພິເສດທາງດ້ານການຄ້າ ແກ່ ສປປ ລາວ ຊຶ່ງມາຮອດປະຈຸບັນ ສປປ ລາວ ໄດ້ຮັບສິດທິພິເສດທາງການຄ້າ ຈາກ 55 ປະເທດ. ໃນນັ້ນ, ໄດ້ຮັບໃນຂອບຝ່າຍດຽວ ຫຼື GSP ຈຳນວນ 46 ປະເທດ ແລະ ໃນຂອບທີ່ຕ່າງຝ່າຍຕ່າງໃຫ້ກັນ ຫຼື FTAs ຈຳນວນ 15 ປະເທດ (ມີບາງປະເທດໄດ້ໃຫ້ແບບຝ່າຍດຽວນໍາ). 46 ປະເທດ ທີ່ໄດ້ຮັບແບບຝ່າຍດຽວ ປະກອບມີ: ສະຫະພາບເອີຣົບ ຫຼື ອີຢູ 27 ປະເທດ, ອັງກິດ, ສະວິດເຊີແລນ, ການາດາ, ອົດສະຕາລີ, ນິວຊີແລນ, ຕວກກີ, ນອກແວ, ລັດເຊຍ, ເບລາຣຸສ, ກາຊັກສະຖານ, ມົງໂກເລຍ, ສີລັງກາ, ບັງກາລາເດັສ, ຍີ່ປຸ່ນ, ສ.ເກົາຫຼີ, ອິນເດຍ, ສປ ຈີນ, ຮົງກົງ ແລະ ຈີນໄຕ້ຫວັນ; 15 ປະເທດ ທີ່ໄດ້ຮັບແບບຕ່າງຝ່າງຕ່າງໃຫ້ກັນ ພາຍໃຕ້ 10 ສະບັບສັນຍາການຄ້າເສລີ (FTAs) ປະກອບມີ: ປະເທດສະມາຊິກອາຊຽນ 09 ປະເທດ, ສປ ຈີນ, ສ.ເກົາຫຼີ, ຍີ່ປຸ່ນ, ອິນເດຍ, ອົດສະຕາລີ, ນິວຊີແລນ ແລະ ເຂດປົກຄອງພິເສດຮົງກົງ, ສປ ຈີນ.
ກົມການຄ້າຕ່າງປະເທດ, ກະຊວງອຸດສາຫະກຳ ແລະ ການຄ້າ ເປັນໜ່ວຍງານຄຸ້ມຄອງວຽກງານແຫຼ່ງກຳເນີດສິນຄ້າສົ່ງອອກແບບລວມສູນໃນຂອບເຂດທົ່ວປະເທດ. ພາກສ່ວນໃດສົນໃຈກ່ຽວກັບວຽກງານແຫຼ່ງກຳເນີດສິນຄ້າສົ່ງອອກ ສາມາດສອບຖາມລາຍລະອຽດນໍາກົມການຄ້າຕ່າງປະເທດ ຕາມເບີໂທ: 021 450255 ແລະ ສາມາດເຂົ້າໄປສຶກສາຂໍ້ມູນໄດ້ທີ່ເວັບໄຊທ໌: www.laotradeportal. gov.la, www.ecolao.gov.la.